Færslur og síður: hver er munurinn?

WordPress geymir efni aðallega sem færslur og síður. Hér lærirðu muninn á þeim og hvenær hvor gerðin á við.

Nú þegar þú ratar um stjórnborðið er kominn tími til að skoða efnið sjálft. Í WordPress eru tvær helstu gerðir efnis: færslur (Posts) og síður (Pages). Þær eru skrifaðar í sama ritlinum og líta svipað út á skjánum, en þær gegna ólíku hlutverki á vefnum.

Færslur: fréttir, blogg og tilkynningar

Færslur eru efni sem tengist ákveðnum tíma: fréttir, bloggfærslur, tilkynningar og greinar. Þær birtast í tímaröð, nýjasta efst, á fréttasíðu eða forsíðu vefsins. Hver færsla hefur dagsetningu og höfund og má raða í flokka og merkja með efnisorðum, svo lesendur geti fundið skylt efni.

Á sýnivefnum eru færslur eins og „Nýr haustmatseðill kominn í hús“ og „Kanilsnúðar ömmu: uppskriftin loksins opinber“. Efst í listanum sérðu hve margar færslur eru til í heild, hve margar eru birtar, hve margar eru áætlaðar (tímasettar fram í tímann) og hve margar eru drög.

Síður: efni sem stendur

Síður eru fyrir efni sem breytist sjaldan og tengist ekki ákveðinni dagsetningu: „Um okkur“, „Hafa samband“, matseðill, verðskrá eða þjónustulýsingar. Síður eru ekki flokkaðar eða merktar og birtast ekki í fréttastraumnum. Þær eru yfirleitt aðgengilegar úr valmynd vefsins í staðinn.

Á síðulistanum sérðu að sumar síður hafa skýringu aftan við titilinn, til dæmis stendur „Cart Page“ aftan við Cart. Það þýðir að viðbót, hér netverslunarviðbótin WooCommerce, notar síðuna í ákveðnum tilgangi. Slíkum síðum er best að eyða ekki.

Hvort á ég að nota?

• Skiptir dagsetningin máli og verður efnið „gamalt“ með tímanum? Þá er það færsla.
• Á efnið að standa óbreytt og vera aðgengilegt úr valmyndinni? Þá er það síða.
• Viltu að lesendur geti flett eftir efni, til dæmis öllum uppskriftum? Notaðu færslur með flokkum.

ÁbendingMargir fyrirtækjavefir eru eingöngu byggðir úr síðum, og það er í góðu lagi. Fréttir eða blogg eru þó góð leið til að halda vefnum lifandi og gefa leitarvélum nýtt efni.

Flestir WordPress-vefir eru blanda af hvoru tveggja. Í næsta kafla búum við til fyrstu færsluna í kubbaritlinum.