Kafli 16 af 18

Viðbætur: að bæta virkni við vefinn

3 mín. lestur

Viðbætur (plugins) bæta nýrri virkni við WordPress, allt frá vefverslun til bókunarforms. Hér sérðu hvernig þú setur þær inn, og hvernig þú velur þær svo vefurinn haldist öruggur.

WordPress gerir margt sjálft, en stundum vantar virkni sem er ekki innbyggð: vefverslun, leitarvélabestun, bókunarkerfi eða ruslpóstvörn. Þá koma viðbætur (e. plugins) til sögunnar. Í opinberu viðbótasafni WordPress eru tugþúsundir viðbóta, flestar ókeypis.

Viðbæturnar sem eru uppsettar

Undir Viðbætur → Uppsettar viðbætur sérðu allar viðbætur á vefnum. Athugaðu að viðbót getur verið uppsett án þess að vera virk. Það þarf tvö skref: fyrst að setja hana upp, svo að virkja hana.

Síðan Viðbætur í WordPress með fjórum viðbótum: Akismet Anti-spam og Hello Dolly, sem eru óvirkar, og WooCommerce og Yoast SEO, sem eru virkar. Hægra megin er dálkurinn Automatic Updates með tenglinum Enable auto-updates við hverja viðbót. — Virkar viðbætur eru merktar með blárri línu til vinstri og hafa „Gera óvirkt“ undir nafninu. Óvirkar hafa „Activate“ og „Eyða“.

Á sýnivefnum eru WooCommerce (vefverslun) og Yoast SEO (leitarvélabestun) virkar. Akismet, ruslpóstvörn sem fylgir WordPress, og Hello Dolly, lítið sýnidæmi, eru uppsettar en óvirkar. Um WooCommerce og Yoast SEO eru sérstök námskeið hér á vefnum.

Að setja inn nýja viðbót

Smelltu á „Add Plugin“ efst eða í valmyndinni undir Viðbótum.
Skoðaðu flipana Efst á baugi, Vinsælt og Mælt með, eða leitaðu í reitnum „Leita í viðbótum“.
Lestu um viðbótina: hvenær hún var síðast uppfærð, hve margir nota hana og hvort hún er samhæfð þinni útgáfu af WordPress.
Smelltu á „Install Now“ og bíddu meðan WordPress sækir hana.
Smelltu á „Activate“. Oft bætist þá nýtt atriði við valmyndina vinstra megin, þar sem stillingar viðbótarinnar eru.

Síðan „Bæta við viðbót“ með flipunum Efst á baugi, Vinsælt, Mælt með, Uppáhöld og WooCommerce Marketplace. Viðbætur birtast á kortum með hnappinum Install Now, stjörnugjöf, fjölda virkra uppsetninga og hvenær þær voru síðast uppfærðar. — Neðst á hverju korti eru upplýsingarnar sem skipta máli: einkunn, fjöldi uppsetninga, síðasta uppfærsla og samhæfni.

Hnappurinn „Hlaða upp viðbót“ efst er fyrir viðbætur sem þú hefur keypt og fengið sem .zip-skrá frá framleiðanda.

Öryggi: færri og vel viðhaldnar viðbætur

Hver viðbót er kóði frá þriðja aðila sem keyrir á vefnum þínum. Flest innbrot í WordPress-vefi verða í gegnum viðbætur sem hafa ekki verið uppfærðar. Nokkrar einfaldar reglur:

Settu aðeins inn viðbætur sem þú þarft í raun. Færri viðbætur þýða minni áhættu og hraðari vef.
Veldu viðbætur sem eru uppfærðar reglulega og notaðar af mörgum. Viðbót sem hefur ekki verið uppfærð í ár er varhugaverð.
Sæktu viðbætur aðeins úr opinbera safninu eða beint frá traustum framleiðanda, aldrei „ókeypis“ útgáfur af greiddum viðbótum af öðrum vefjum.
Eyddu viðbótum sem þú notar ekki, í stað þess að láta þær liggja óvirkar.
Uppfærðu reglulega, og taktu afrit af vefnum áður. Í dálkinum „Automatic Updates“ geturðu kveikt á sjálfvirkum uppfærslum.

ÁbendingEf vefurinn hættir að virka eftir að þú setur inn viðbót skaltu gera hana óvirka. Oft lagast vandinn strax.