Hvernig býrðu til bloggsíðu í WordPress?

Frá léni til fyrstu færslu: svona kemurðu upp bloggi á eigin .is-léni með WordPress, hvort sem það er sjálfstætt blogg eða fréttasíða á vef fyrirtækisins.

WordPress byrjaði sem bloggkerfi og er enn eitt besta verkfærið til að halda úti bloggi. Hvort sem þú vilt sjálfstætt blogg eða fréttasíðu á vef fyrirtækisins eru skrefin svipuð. Hér förum við yfir þau í réttri röð.

Það sem þú þarft

• Lén, til dæmis .is-lén. Þau eru skráð hjá ISNIC (isnic.is), þar sem þú getur leitað að lausu nafni og skráð það.
• Vefhýsingu, sem er heimili vefsins. Veldu hýsingu sem er stillt fyrir WordPress og sér um uppfærslur og afritun, því það sparar þér mikla fyrirhöfn.
• WordPress sjálft, sem er ókeypis. Flestar WordPress-hýsingar setja það upp fyrir þig eða bjóða uppsetningu með einum smelli.

Veldu útlit

Nýr WordPress-vefur kemur með sjálfgefnu þema, til dæmis Twenty Twenty-Five, sem hentar vel fyrir blogg. Undir Útlit í stjórnborðinu geturðu skoðað önnur þemu og sett þau upp. Nýrri þemu eru svokölluð kubbaþemu (block themes), og þá breytirðu haus, fæti, litum og letri í ritlinum undir Útlit, án þess að snerta kóða.

Forsíða og bloggsíða

Sjálfgefið sýnir forsíða WordPress nýjustu færslurnar. Það hentar hreinu bloggi. Ef þú vilt hins vegar fasta forsíðu, til dæmis kynningu á fyrirtækinu, og bloggið á sérsíðu, gerirðu svona:

1. Farðu í Síður og búðu til tvær síður: eina sem heitir til dæmis „Forsíða“ og aðra sem heitir „Blogg“ eða „Fréttir“. Bloggsíðan má vera tóm, því WordPress fyllir hana sjálft með færslunum.
2. Farðu í Stillingar → Lestur.
3. Við „Forsíðan þín sýnir“ velurðu „Síða (veldu hér að neðan)“.
4. Veldu forsíðuna í reitnum Homepage og bloggsíðuna í reitnum Færslusíða.
5. Smelltu á „Vista breytingar“.

Á sama skjá stillirðu hversu margar færslur birtast á hverri síðu bloggsins. Neðst er reiturinn „Letja leitarvélar í að fara yfir þennan vef“. Hann má nota á meðan vefurinn er í smíðum, en mundu að taka hakið af þegar bloggið fer í loftið, annars finnst það síður í leit.

Fyrsta færslan

Farðu í Færslur og smelltu á „Add Post“. Þá opnast kubbaritillinn: þú skrifar titilinn efst og byrjar svo að skrifa. Hver efnisgrein, mynd eða fyrirsögn er sérstakur kubbur, og nýja kubba sækirðu með plústákninu. Í hliðarstikunni velurðu flokk, forsíðumynd og stutt ágrip. Þegar færslan er tilbúin smellirðu á „Birta“ (Publish).

ÁbendingSettu bloggsíðuna í valmynd vefsins svo gestir finni hana. Í kubbaþemum gerirðu það í leiðsagnarkubbnum (Navigation) í ritlinum undir Útlit.

Viðbætur eftir þörfum

Viðbætur bæta við virkni sem þemað hefur ekki, til dæmis samskiptaformi eða leitarvélabestun. Þú finnur þær undir Viðbætur. Byrjaðu smátt: hver viðbót er kóði sem þarf að uppfæra og viðhalda, svo það borgar sig að setja aðeins upp það sem þú notar í raun.

Sjá einnig: WordPress-vefhýsing