Uppsetning WooCommerce og íslenskar stillingar

Settu WooCommerce upp, farðu í gegnum upphafsferlið og stilltu verslunina á íslenskar krónur og íslenskan virðisaukaskatt.

WooCommerce er viðbót og er sett upp eins og aðrar viðbætur. Ef þú hefur farið í gegnum kaflann um viðbætur í WordPress-námskeiðinu kannastu við ferlið.

Viðbótin sett upp

1. Farðu í „Viðbætur“ í valmyndinni vinstra megin og veldu að bæta við nýrri viðbót (Add New Plugin).
2. Skrifaðu WooCommerce í leitarreitinn.
3. Smelltu á „Setja upp“ (Install Now) við WooCommerce og svo á „Virkja“ (Activate).
4. WooCommerce opnar upphafsskjá, „Welcome to Woo!“. Smelltu á „Set up my store“ til að svara nokkrum spurningum um verslunina, til dæmis hvar hún er og hvað hún selur. Þú getur líka valið „Skip guided setup“ og stillt allt handvirkt eins og við gerum hér að neðan.

ÁbendingÁ upphafsskjánum er hakreitur um að deila gögnum með WooCommerce til að sérsníða uppsetninguna. Hann er valfrjáls og þú getur tekið hakið af.

Upphafsferlið mælir stundum með aukaviðbótum og þjónustu frá WooCommerce. Ekkert af því er nauðsynlegt. Hakaðu aðeins við það sem þú veist að þú þarft, því hver viðbót er eitthvað sem þarf að uppfæra og viðhalda.

Að uppsetningu lokinni bætast nýir liðir við valmyndina. Undir WooCommerce eru Home, Orders, Customers, Coupons, Reports, Settings, Status og Extensions, og sér í valmyndinni eru Products, Payments, Analytics og Marketing. Viðmót WooCommerce er að mestu á ensku, svo við notum ensku heitin hér.

Almennar stillingar

Farðu í WooCommerce og veldu Settings. Efst eru flipar fyrir General, Products, Shipping, Payments, Accounts & Privacy, Emails og fleira. Fyrsti flipinn, General, geymir grunnupplýsingar verslunarinnar.

• Heimilisfang verslunar (Store Address): Address line 1, City, Country / State og Postcode. WooCommerce notar heimilisfangið við útreikning á sköttum og sendingum.
• Sölusvæði (Selling location(s)): hvort þú selur til allra landa eða aðeins sumra. Ef þú selur bara innanlands velur þú Ísland. Fyrir neðan er sambærileg stilling fyrir sendingar (Shipping location(s)).
• Gjaldmiðill (Currency), neðar á síðunni: veldu íslenska krónu (ISK). Sjálfgefið eru verð í dollurum.
• Snið verðs: krónan hefur enga aukastafi, svo stilltu fjölda aukastafa á 0. Algengt er að nota punkt sem þúsundaskil og hafa „kr.“ á eftir upphæðinni.

Virðisaukaskattur: 24% og 11%

Á Íslandi er almennt virðisaukaskattsþrep 24% og lægra þrepið 11%. Lægra þrepið á meðal annars við um flestar matvörur og bækur. Í dæminu okkar fara kaffibaunirnar í 11% en bollinn í 24%.

1. Í almennu stillingunum skaltu haka við að virkja skatta (Enable tax rates and calculations) og vista.
2. Þá birtist nýr flipi, Tax, í stillingunum. Þar velur þú hvort verð eru slegin inn með eða án VSK. Flestar íslenskar verslanir slá inn verð með VSK, því það er verðið sem viðskiptavinurinn sér.
3. Opnaðu Standard-skattflokkinn og bættu við línu: land IS, hlutfall 24, heiti VSK.
4. Opnaðu Reduced rate-flokkinn og bættu við línu: land IS, hlutfall 11, heiti VSK.
5. Á hverri vöru velur þú svo skattflokkinn sem á við.

ÁbendingGjafabréf, þjónusta og sérstakar vörur geta lotið öðrum reglum. Fáðu staðfestingu hjá bókaranum þínum áður en þú opnar verslunina.

Í næsta kafla förum við yfir sendingarsvæði og sendingarleiðir.