Sendingarsvæði og sendingarleiðir

Stilltu hvert þú sendir og hvað það kostar: sendingarsvæði, fast sendingargjald, frí sending og sótt á staðinn.

Áður en viðskiptavinur getur klárað pöntun á efnislegri vöru þarf WooCommerce að vita hvert má senda og hvað það kostar. Það er stillt með sendingarsvæðum (Shipping zones) og sendingarleiðum (Shipping methods). Þetta þarf að gera jafnvel þótt þú sendir eingöngu innanlands.

Sendingarsvæði

Sendingarsvæði er hópur landa, landshluta eða póstnúmera sem fá sömu sendingarkosti. Þú gætir til dæmis haft eitt svæði fyrir Ísland og annað fyrir Norðurlöndin. Farðu í WooCommerce, veldu Settings og svo flipann Shipping. Á nýrri verslun er listinn tómur og WooCommerce útskýrir hvernig svæðin virka.

1. Smelltu á „Add zone“ til að búa til nýtt svæði.
2. Gefðu svæðinu heiti, til dæmis „Ísland“. Heitið sést ekki hjá viðskiptavinum, það er bara fyrir þig.
3. Veldu land eða landsvæði sem tilheyra svæðinu. Ef þú vilt aðeins senda á ákveðin póstnúmer geturðu takmarkað svæðið við þau.
4. Bættu við einni eða fleiri sendingarleiðum (sjá hér að neðan) og vistaðu.

Hver viðskiptavinur lendir aðeins í einu svæði, út frá sendingarheimilisfanginu, og sér þá aðeins sendingarleiðir þess svæðis. Ef heimilisfang fellur ekki undir neitt svæði sem þú hefur skilgreint er ekki hægt að senda þangað nema þú bjóðir leiðir fyrir „önnur svæði“.

Sendingarleiðir

Á hvert svæði bætir þú sendingarleiðum. Þessar eru algengastar:

• Fast gjald (Flat rate): eitt sendingargjald á pöntunina, til dæmis 1.200 kr. fyrir póstsendingu innanlands. Hægt er að bæta við gjaldi eftir sendingarflokkum ef sumar vörur eru þyngri eða fyrirferðarmeiri.
• Frí sending (Free shipping): viðskiptavinurinn greiðir ekkert. Hægt er að binda hana við lágmarksupphæð, til dæmis fría sendingu ef pantað er fyrir 10.000 kr. eða meira, eða við afsláttarkóða.
• Sótt á staðinn (Local pickup): viðskiptavinurinn sækir pöntunina sjálfur. Í nýlegum útgáfum er þetta stillt sér, undir tenglinum Local pickup efst á Shipping-flipanum, þar sem þú skráir afhendingarstaði. Kaffihúsið Bolli gæti til dæmis boðið upp á að sækja kaffibaunirnar á kaffihúsið.

Í stillingum hverrar sendingarleiðar geturðu breytt heitinu sem viðskiptavinurinn sér, sett inn verð og valið hvort sendingarkostnaðurinn er skattskyldur. Gefðu leiðunum skýr heiti á íslensku, eins og „Heimsending með pósti“ eða „Sækja á kaffihúsið“.

ÁbendingMargir íslenskir flutningsaðilar bjóða eigin WooCommerce-viðbætur sem sækja verð og afhendingarstaði sjálfkrafa. Kannaðu hvað þinn flutningsaðili býður áður en þú stillir allt handvirkt.

Vörur sem eru ekki sendar, eins og gjafabréf sem send eru í tölvupósti, eru merktar sem sýndarvörur og þá er sendingarkostnaður ekki reiknaður. Það skoðum við í sjötta kafla. Í næsta kafla búum við til fyrstu vöruna.