Leiðbeiningar
Svona setur þú upp Google Analytics 4 í WordPress
Google Analytics 4 sýnir hvaðan gestirnir koma og hvað þeir gera á vefnum. Svona stofnarðu eign, finnur mælikóðann og tengir hann við WordPress, með vafrakökusamþykki í lagi.
Ef þú rekur vef viltu vita hverjir koma, hvaðan þeir koma og hvað þeir gera. Ókeypis greiningartól Google, Google Analytics, svarar þessum spurningum. Eldri útgáfan, Universal Analytics, hætti að safna gögnum sumarið 2023, svo ef vefurinn þinn er enn með gamlan mælikóða sem byrjar á „UA-“ er hann ekki að mæla neitt lengur. Arftakinn heitir Google Analytics 4, oftast kallað GA4.
Hvað sýnir GA4?
- Hvaðan heimsóknirnar koma: úr leitarvélum, af samfélagsmiðlum, frá öðrum vefjum eða beint.
- Hvaða síður eru mest skoðaðar og hvar gestir hætta.
- Hvort gestir nota síma, spjaldtölvu eða tölvu, og frá hvaða landi þeir koma.
- Aðgerðir sem skipta þig máli, eins og útfyllt form, smelli á símanúmer eða kaup í vefverslun.
GA4 byggir á atburðum (events) í stað síðuflettinga. Margt er mælt sjálfkrafa, eins og flettingar, skrun, smellir á ytri hlekki og niðurhal skjala, en annað þarf að setja upp sérstaklega.
Skref 1: Stofnaðu eign og gagnastraum
- Farðu á analytics.google.com og skráðu þig inn með Google-aðgangi. Gott er að nota aðgang á vegum fyrirtækisins, ekki einkanetfang starfsmanns.
- Stofnaðu reikning (Account) fyrir fyrirtækið og síðan eign (Property) fyrir vefinn. Veldu Ísland sem tímabelti og íslenskar krónur sem gjaldmiðil.
- Þegar spurt er um gagnastraum (data stream) velurðu Web og slærð inn slóð vefsins.
- Þá birtist mælikenni (Measurement ID) sem byrjar á „G-“, til dæmis G-AB12CD34EF. Það er lykillinn sem tengir vefinn við eignina.
Skref 2: Tengdu GA4 við WordPress
Einfaldasta leiðin fyrir flesta er viðbótin Site Kit by Google, sem Google gefur sjálft út. Hún tengir vefinn við Google-aðganginn þinn og getur líka tengt Search Console, svo þú sérð helstu tölur beint í stjórnborði WordPress.
- Í stjórnborðinu ferðu í Viðbætur og bætir við nýrri viðbót. Leitaðu að „Site Kit by Google“, settu hana upp og virkjaðu.
- Smelltu á uppsetningarhnappinn sem birtist og skráðu þig inn með sama Google-aðgangi og á eignina.
- Veldu að tengja Analytics og veldu eignina og gagnastrauminn sem þú stofnaðir.
Hin leiðin er að setja mælikóðann (Google tag) beint í haus (head) vefsins, annaðhvort með viðbót sem leyfir að bæta kóða í haus eða í þemanu sjálfu. Það hentar ef þú vilt sem fæstar viðbætur, en þá þarf að gæta þess að kóðinn detti ekki út þegar þema er uppfært eða skipt um það.
ÁbendingOpnaðu vefinn í öðrum vafra og skoðaðu Rauntíma-skýrsluna (Realtime) í GA4. Ef heimsóknin þín birtist þar innan nokkurra mínútna virkar tengingin.
Ekki gleyma vafrakökusamþykki
GA4 notar vafrakökur, og samkvæmt evrópskum persónuverndarreglum, sem gilda líka á Íslandi, þarf samþykki gesta áður en vafrakökum sem ekki eru nauðsynlegar er komið fyrir. Vefurinn þarf því samþykkisborða þar sem gestir geta hafnað jafn auðveldlega og þeir samþykkja, og mælingin á aðeins að fara í gang eftir samþykki.
Margar samþykkisviðbætur fyrir WordPress styðja Consent Mode frá Google, sem lætur Google-merkin vita hvað gesturinn samþykkti. Uppfærðu líka persónuverndarstefnu vefsins þannig að þar komi fram að þú notir Google Analytics og í hvaða tilgangi.
